2019/KW45 Sunntigsrundi

Tja vor knapp 10 Mönät bin ich z'letscht uf de gnoppte Pneu underwegs gsi - natürli mit em Bike Team Egg. Isch scho chli ungwonnt gsi uf dem cheibe Töff. Aber meh Problem hät d'Temperatur gäh. Es Fraueproblem: "Was söll i aleggä?" Will au da kein Erfahrigswert, will vor über zwei Mönät z'letscht ufere Harley-Trampmeinsohn ghocket. Und s'Termometerli hät knapp über em Chreisili azeiget. Hm! Und diä fiin Iisschicht uf em Teich, händ es warms Pulöverli meh an Ranze anepappe lah.   

Ohä, so grausam chalt isch das gar nöd. Scho recht adämpft in Hinderegg acho. Uf em Weg ufe id Guldene di erscht Niedergarstufe erreicht. Eigentli scho nach foif Minute in Neuhuus, wo de Hartmä sich gfröget hät wieso er an Treffpunkt abegrolled isch. Dobe hät mer knapp de gfrorni Furz dur de Nebel chöne erspähe, bevor de ziitlosi Fischer au de Hügel ufe z'hechle cho isch. 

Tutti in Gruppo isch es an füechte Waldrand füre gange, händ eus dur diä schwümendi Wiise dure tankt und sind id Eri-Hütte kurblet. S'Feld id längi zoge, was am Füerende d'Glegeheit gäh hät de nonig usegschwitzti Amarone vo geschte Abig hinder de Hütte z'deponiere.

De Iistiig in erschte Trail isch umgschtaltet worde, es fehlet es paar Bäum. Di nasse Wurzle und de ungriffig Matsch händ für di eint oder anderi schnatterndi Muffe gsorget, sind aber all im Sattel blibä. De zweiti Teil vom Trail isch jetzt e Liächtig...! Und i de Guldene selber häts gschittä und gräblet...? Am Markus sis Hinderrad oder isch es jetzt d'Achs oder s'Ritzel gsi, hät echli Pfleg brucht. Isch aber tifig wiiter gange, eifach für ihn mit ihgschränkter Ganguswahl. Egal, mer händ de Luz scho gschmöckt und sind au no über di letschte Baum-Hindernis gumpet: "Frölein 7 Lüz!" - "Äh, nei für mich es Kafi." HÄ?!?

<< au mit 44gi no Füür i de Hosä!             Kafi ohni Luz, isch wiä...      Haarschniedä bim Beck!>>

Ganz hochstehendi Phantasiä wenn so es paar Mannä mit liechtem Suurstoffmangel Luz schlürfend über noii Egger Gwerbetriibendi philosophieret....!

Mer händ eus vom Fischer verabschiedet und sind talwärts gstürzt. Mit vill Muet under em Helm. So Zwetschgewässerli hilft halt scho, s'Vertraue i de Göpel under eim z'stärche (oder isch äs es Gfahre usblende?). Trotz aspruchsvolle Verhältnis sind all heil dehei acho. 

Cooli Rundi, dankä Jungs!

Riders: Christoph, Ruedi, Paschi, Markus, Remo, Fischer, Beck

Luz Sponsoring: Ruedi