2019/KW04 Sunntigsrundi

Es isch eso. Wenn de Paschi ufrüeft zum Sunntigsusfährtli, verschlaft er meischtens….. ;o)

De Beck hät gspannt vo Hinderegg uf d’Chrüzig nach Egg abe g’linset und g’wartet öb da jetzt de Maa us Usservollikä z’fahre chäm. Nüt! Churz s’Handy us em Liibli gnuschlet und – aha! – es What’s App Nachrichtli. Also friedlich zur Egger Ussestation g’kurblet und de Siebeschläfer abgholt.
Dä isch grad echli übermotiviert los dampft. Han em im Gibisnüt müesse fröge, was er gstohlä heb. Da hät er denn echli g’ruhiget. S’Wurzelwägli duruf isch eus no en pfiilschnelle Jogger entgege z’schüsse cho und mir händ eus langsam a di spezielle Verhältnis anetaschtet. Im Steilstuck isch’s zum Glück aper gsi und bis zum Vordere-Pfanni trotz erste dunkle Stelle recht griffig. De steili Ufstiig im Schnee isch grad no en Tigg härter als suscht scho. Das isch mit ere warme Schoggi belohnt worde.

D’Pischte duruf zum höchschte Punkt. Hm, sött scho nachli anerüere wenn mer da wett es Skiränne fahre… Aber mir händ anderi Sorge gha, es isch nämli progressiv duruf und d’Lungä händ nach Suurstoff gruefe. Dobe im Flachstuck bis zur Guldene isch es uneinne teils recht glasig gsi. Also grad hebe, nöd emal dra denke de Lenker z’bewege und nur mit Gwichtsverlagerig schaffe. De Beck hät sich klevererwiis vo de warme Temperature im Dorf zum ene Pneuwechsel hiiriise la und isch mit de abgfahre normalo Pneus da obe umegrutscht. D’Spikes nützed vill i de Garage!

Jetzt hämmer d’Hauptpfäd verlah und sind uf es Nebetwegli iibogä. E guet begangeni lingi Spur und rechts eher weniger – wärum fahr ich genau da äne? Jetzt härt Steuerbord, das mer füre zum erschte Trail chömed. Aber das Forschtwegli isch no weniger begange gsi als di zwei Spure vo vorher. Da isch niä en Traktor dure nur es 20cm Trampelpfädli. Mer hät recht müesse ziile, en gwüsse Grundspeed ha das mer sich bis zum Iispiitgspunkt vom Singletrail hät chöne kämpfe. De Trail e chlini Iisbahn hät am Paschi sini Rossette zum schnattere bracht. Uf de breite rutschige Forschtweg hät er sich wohler gfühlt, obwohls da nöd würkli besser ghebet hät. Wobi mer vo hine sinere Körpersprach a gseh hät, das er nöd e so relaxed uf em Göppel sitzt.

Erscht underhalb vo de Forchbahngleis i de Schüürä isch de wenig Schnee wieder griffig worde. Defür hät de überholendi BMW de Randstei küsst uf de Gegefahrbahn. Mir händ eus via Hinderegg und Egg wieder zum Schopf ufe gschlichä und eus es chliises Isotonischs gönnt.

E buechstägblich glatti Sach gsi!  

>> Filmli <<

Riders: Paschi, Roger